بیان‌نیوز
وزارت خارجه‌ی طالبان اعلام کرده که امیرخان متقی، سرپرست این وزارت در راس یک هیات برای شرکت در یک نشست بین‌المللی، عازم تاشکنت پایتخت اوزبیکستان شده است.
این وزارت گفته است که هیات طالبان امروز یک‌شنبه(2 اسد) به اوزبیکستان رفته است.
به گفته‌ی وزارت خارجه طالبان، دولت اوزبیکستان از یک نشست بین‌المللی با محوریت افغانستان میزبانی می‌کند.
گفته می‌شود که این نشست برای سه روز با اشتراک نمایندگان دیپلماتیک کشورهای منطقه و جهان برگزار خواهد شد که فردا نخستین روز آن خواهد بود.
با تحولات ده ماهه‌ی افغانستان، طی چند ماه گذشته شماری از کشورهای همسایه از نشست‌های بین‌المللی با محوریت افغانستان میزبانی کرده و تحولات این کشور را مورد بحث و بررسی قرار دادند.
