بیان‌نیوز
وزارت صنعت و تجارت حکومت سرپرست کابل از دولت اوزبیکستان خواسته که سرمایه‌گذاری‌های اقتصادی خود را در داخل افغانستان بیشتر کند.
قدرت‌الله جمال، معین این وزارت روز یک‌شنبه(۵ سنبله) در دیدار با هیات اوزبیکستان در کابل گفته که حالا امنیت در سراسر این کشور تامین است و زمینه سرمایه‌گذاری‌ها مساعد شده است.
این مقام وزارت تجارت، اوزبیکستان را همسایه‌ی نیک دانسته و گفته که در افغانستان سرمایه‌گذاری کند.
در خبرنامه‌ی وزارت تجارت و صنعت آمده است که معین این وزارت علاوه بر موضوعات فوق، پیرامون اعتماد و هماهنگی میان دو کشور، افزایش فعالیت‌های گمرکی، صدور ویزه تجارتی به بازرگانان افغان، نشست‌های سه‌جانبه میان افغانستان، اوزبیکستان و پاکستان و سایر موارد دیگر صحبت کرده است.
از سوی هم، هیات اوزبیکستان به ریاست ناظم‌جان خالمرادوف، معین وزارت تجارت این کشور همکاری کشورش را در بخش زراعت و معادن اعلام کرده است.
به تازگی یک هیات تجارتی اوزبیکستان جهت تقویت روابط تجارتی دو کشور به کابل آمده و با مقام‌های ارشد امارت اسلامی دیدار و گفت‌وگو کرده است.
