بیان‌نیوز
امام‌علی رحمان، رییس‌جمهوری تاجیکستان در دومین روز هفتادوهشتمین نشست مجمع عمومی سازمان ملل‌متحد در سخنان خود به اوضاع جاری افغانستان اشاره کرد.
او روز چهارشنبه(۲۹ سنبله) گفت که ایجاد حکومت فراگیر، مشارکت همه‌ی اقوام، گروه‌های سیاسی،اجتماعی و گفت‌وگوی بین‌الافغانی تنها راه رسیدن افغانستان به صلح و ثبات دایمی خواهد بود.
رییس‌جمهوری تاجیکستان تاکید ورزید که امنیت و همکاری منطقوی در آسیای مرکزی وابستگی به وضعیت افغانستان دارد.
امام‌علی رحمان با بیان این‌که افغانستان پس از دو سال هنوزهم دچار وضع پیچیده‌ی سیاسی و اقتصادی است، افزود که این کشور بزرگ‌ترین بحران بشری را تجربه می‌کند.
وی از جامعه‌ی جهانی جدا تقاضا کرد که کمک‌های بشری‌شان را برای مردم افغانستان افزایش دهند و تاجیکستان در این زمینه آماده‌ی همکاری می‌باشد.
رییس‌جمهوری تاجیکستان همچنان در بخشی از اظهاراتش به قاچاق مواد مخدر اشاره کرد و ابراز نگرانی نمود که در دو سال اخیر، قاچاق مواد مخدر از قلمرو افغانستان افزایش یافته است.
با این حال، اخیرا مقام‌های تاجیکستانی نیز از قاچاق مواد مخدر از افغانستان ابراز نگرانی کرده بودند.
