بیان‌نیوز – وزارت صنعت و تجارت طالبان از برگزاری نشست دوجانبه با مقام‌های اوزبیکستان در بندر حیرتان در شمال افغانستان خبر داده است.
این وزارت روز سه‌شنبه(۲۹ حوت) در خبرنامه‌ای گفته که در این نشست دو جانبه با مقام‌های اوزبیکستان، نمایندگان وزارت خارجه، مالیه، معادن و پترولیم، اداره‌ی خط آهن افغانستان و والی طالبان در ولایت بلخ حضور داشتند.
در این نشست روی امضای موافقت‌نامه‌های تجارتی دوجانبه، امضای موافقت‌نامه‌های ترانزیتی سه‌جانبه وچند جانبه، صادرات یک میلیون تُن زغال سنگ، سرمایه‌گذاری اوزبیکستان در بخش زراعت، سمنت و تولید برق حرارتی از زغال سنگ و سایر موارد دیگر بحث و گفت‌وگو شده است.
گفتنی است، حکومت طالبان و اوزبیکستان در حال حاضر روابط نزدیک سیاسی و اقتصادی دارد.
اوزبیکستان در یک سال گذشته همواره اعلام آمادگی کرده است که در حاکمیت طالبان در بخش‌های مختلف زیربنایی اقتصادی و تجارتی سرمایه‌گذاری می‌کند.
