بیان‌نیوز – رهبران کشورهای عضو سازمان همکاری شانگهای با اشاره به اوضاع جاری افغانستان تاکید ورزیدند که تنها راه تامین ثبات و صلح در این کشور، تشکیل دولت فراگیر است.
نشست رهبران عضو سازمان همکاری شانگهای برای دو روز( سوم و چهارم جولای) با اشتراک سران کشورهای روسیه، قزاقستان، هند، ایران، چین، قرغیزستان، پاکستان، تاجیکستان، اوزبیکستان، بلاروس، مغولستان، آذربایجان، قطر، امارات متحده عربی، ترکیه و ترکمنستان برگزار شده است.
افغانستان در حالی‌که عضو سازمان همکاری شانگها است، اما رهبران کشورهای عضو این سازمان برای دومین‌بار از هیات طالبان برای اشتراک در نشست این سازمان دعوت نکرده است.
رهبران کشورهای عضو این سازمان با صدور بیانیه‌ی مشترک تاکید کردند که تنها راه تامین صلح و ثبات در افغانستان، تشکیل دولت فراگیر است.
آن‌ها اظهار کرده‌اند که دولتی در افغانستان روی کار آید که نمایندگان تمامی گروه‌های قومی و سیاسی در حکومت کنونی افغانستان حضور داشته باشند.
آن‌ها همچنان اعلام کردند که برای حمایت از تلاش‌ها به منظور عادی‌سازی اوضاع در افغانستان آماده هستند.
این نشست سازمان همکاری شانگهای با شعار «تقویت گفت‌وگوهای چند جانبه – تلاش برای صلح و توسعه پایدار» برگزار شده است.
