بیان‌نیوز – آیبیک عارف، سفیر اوزبیکستان در کابل گفته که کشورش آماده است که در بخش‌های مراکز صحی، کارخانه سمنت و تجارت زغال‌سنگ در افغانستان بیشتر سرمایه‌گذاری کند.
سفیر اوزبیکستان در کابل این وعده را روز دوشنبه(23 دسامبر) در دیدار با عبدالسلام حنفی، معاون اداری نخست‌وزیر حکومت سرپرست داده است.
حنفی در این دیدار به توسعه و گسترش روابط میان دو کشور تاکید ورزیده و گفته که طالبان تمام سهولت‌های لازم را برای بازرگانان و سرمایه‌گذاران فراهم خواهد کرد.
سفیر اوزبیکستان نیز بیان کرده که سرمایه‌گذاران این کشور آماده‌اند در زمینه‌های ایجاد مراکز صحی، واردات دارو، تاسیس کارخانه سمنت، و خرید و تجارت ذغال‌سنگ در افغانستان سرمایه‌گذاری کنند.
این در حالی است که معاون اداری نخست‌وزیر حکومت سرپرست ماه گذشته در راس یک هیات عالی‌رتبه به تاشکند، پایتخت اوزبیکستان رفته بود.
اوزبیکستان از کشورهای همسایه‌ی افغانستان که روابط نزدیک سیاسی و اقتصادی با حکومت سرپرست دارد، اما تا هنوز حکومت طالبان را به رسمیت نشناخته است.
