بیان‌نیوز – ظفر صمد، رییس اداره‌‌ی مبارزه با مواد مخدر تاجیکستان در تازه‌ترین اظهاراتش ادعا کرده است که مواد مخدر از ذخایر بزرگ در شمال افغانستان به روسیه و اتحادیه اروپا قاچاق می‌شود.
این مقام تاجیکستانی روز شنبه(۲۶ حوت) که در شصت‌وهفتمین نشست کمیسیون مواد مخدر سازمان ملل در وین سخنرانی می‌کرد، ادعا نمود که قاچاق مواد مخدر از افغانستان به کشورهای دیگر صورت می‌گیرد.
او افزود که قاچاقبران از افغانستان همچنان تلاش دارند تا مواد مخدر را به تاجیکستان نیز انتقال دهند.
به گفته‌ی صمد، دولت تاجیکستان در حال تقویت مرزهای خود افغانستان و برای مبارزه با قاچاق مواد مخدر، پاسگاه‌های مرزی جدیدی ایجاد می‌کند.
آقای صمد گفت قرار است امسال برنامه بین دولتی سازمان پیمان امنیت جمعی برای تقویت مرز تاجیکستان و افغانستان تصویب شود.
گفتنی است، طالبان پس از روی کار آمدن در افغانستان، فرمان منع کشت و قاچاق مواد مخدر را صادر کرد و براساس این فرمان، هیچ‌کسی حق کشت، قاچاق و فروش مواد مخدر را ندارد.
پس از اجرای این فرمان، کشت و قاچاق مواد مخدر در این کشور به صفر رسیده است و این تلاش طالبان مورد استقبال بین‌المللی قرار گرفته است.
